Бу сыл кулун  тутар ыйын  13 күнүгэр Хаҥалас улууһун Нөмүгү нэһилиэгэр «Түһүлгэ» Култуура киинигэр биир улахан тэрээһин буолан ааста. Ол курдук, Нөмүгүтээҕи народнай театры тэрийэн үлэлэппит, өр сылларга режиссердаабыт, СР норуот артыыһа, СР Үтүөлээх артыыһа, Щепкин аатынан театральнай училище маҥнайгы выпускниктарыттан биирдэстэрэ, киинэ артыыһа Федотов Спартак Петрович 90 сааһыгар аналлаах «Умуллубат сулустар» диэн бастыҥ эр киһи оруолун толорооччу Өрөспүүбүлүкэтээҕи көрүү-күрэҕэ буолан ааста. Манна даҕатан эттэххэ, Нөмүгүтээҕи народнай театрга Спартак Петрович Федотов аата Театр сылыгар иҥэриллибитэ.

Бу олус сэргэх күрэххэ түөрт норуот театрыттан артыыстар кытыннылар. С. П. Федотов аатынан Нөмүгүтээҕи народнай театр, Бэрдьигэстээхтээҕи народнай театр, П. В. Толстяков аатынан Чөркөөхтөөҕү народнай театр уонна Д. Я. Гермогенова аатынан Күөрдэмнээҕи народнай театр артыыстара бэйэлэрин талааннарын көрөөччү дьүүлүгэр таһаардылар. Сайаапка бэриллибитинэн аҕыс артыыс кыттыыны ылла: Василий Дорофеев, Александр Павлов, Федот Богимов, Ньургун Давыдов, Никифор Лыткин, Дмитрий Дмитриев, Николай Ефимов, Валерий Говоров. Бастыҥ эр киһи оруолун толорооччу аата убаастабыллаах жюри сыанабылынан быһаарылынна. Жюри хамыыһыйатын чилиэттэрэ: СР РПЦ МКиДРрежиссера, РФ СТД бырабылыанньатын чилиэнэ, СР Култууратын Үтүөлээх үлэһитэ Адамова С. С. – бэрэссэдээтэл, Нөмүгү нэһилиэгин дьаһалтатын баһылыга Устинов Н. В., СР Култууратын туйгуна, Өктөмнөөҕү народнай театр режиссера Аржакова З. Е., С. П. Федотов кыыһа Федотова И. С..

Бу бырайыак Нөмүгү нэһилиэгин «Түһүлгэ» Култуура Киинин көҕүлээһининэн уонна олохтоох дьаһалтата 30 тыһ. солк. Гран-при туруоран, олоххо киирдэ. Тэрээһиҥҥэ нэһилиэк баһылыга жюрига көхтөөхтүк кыттыыны ылбыта олус хайҕаллаах суол. Спартак Петрович оҕолоро эмиэ туора турбакка, дьиэ кэргэн аатыттан Спецприз олохтообуттара. Бу тэрээһин спонсордарынанХаҥалас улууһун мунньаҕын депутатаПротодьяконов Б. П.,  Хаҥалас улууһун Култууратын салалтата уонна Киинэ буолаллар.

«Умуллубат сулустар» күрэх түмүгүнэн көрсүһүү, ырытыы, уопут атастаһыыта буолла. Аныгыскы күрэх боппуруостарын быһаарсыыга Нөмүгү нэһилиэгин баһылыга Устинов Наум Васильевич кыттааччылар уонна жюри санааларын учуоттаан, өссө үрдүк таһымнаахтык ыытарга эрэмньитин биллэрдэ.

«Успешное воплощение образа» — Александр Павлов (Бэрдьигэстээх, Горнай улууһа), «Лучшая мужская роль второго плана» -Николай Ефимов (Күөрдэм нэһ., Хаҥалас), «Открытие конкурса» -Федот Богимов (Нөмүгү нэһ., Хаҥалас),«Лучшее художественное исполнение» — Егор Решетников (Черкөөх нэһ., Таатта), «Приз зрительских симпатий» -Дмитрий Дмитриев (Күөрдэм нэһ., Хаҥалас), “Гран-При”- Василий Дорофеев (Черкөөх нэһ., Таатта) бириискэ тиксэн, үөрүүлэрэ үрдээтэ. Күрэх кыайыылаахтарыгар өссе элбэх ситиһиини, саҥа оруоллары, умсугутуулаах репертуары баҕарабыт! Аныгыс күрэххэ көрсүөххэ диэри!

Ыстатыйаны суруйда Маркова С.М.