Алтынньы ыйын 25 күнүгэр «Түһүлгэ» култуура киинигэр саха төрүт таҥаһын тигиигэ Саха Өрөспүүбүлүкэтин норуот маастара, Нөмүгү нэһилиэгин бочуоттаах олохтооҕо Анисимова Мария Михайловна төрөөбүтэ 90 сылыгар аналлаах ахтыы киэһэтэ буолан ааста. Бу тэрээһиҥҥэ кини оҥорбут үлэлэрин быыстапката, оҕолоро, сиэннэрэ, хос сиэннэрэ, «Талба» ырыа ансаамбыл, Ньургуйаана Соломова, Ньургустаана Иванова кыттыылаах кэнсиэркэ Мария Михайловна кыыһа Анисимова Анна Егоровна «Удьуор утума салҕанар» диэн бэйэтэ тикпит аныгылыы күннээҕи олоххо кэтиллэр куппай соннорун, көстүүмнэрин коллекциятын биир дойдулаахтарыгар көрдөрөн үөртэ. Көрөөччүлэр Мария Михайловна тикпит таҥастарын кэнчээри ыччата сценаҕа кэтэн тахсыбыттарыттан астыннылар уонна дуоһуйдулар. Култуура киинин бу — «Нөмүгүбүт ытык дьоно» диэн өйдөбүнньүк ахтыы киэһэлэргэ анаммыт бырайыакпыт 2023 сылтан саҕаламмыта. Бу бырайыак чэрчитинэн ытык-мааны дьоммутугар: Анна Ивановна Кузьминаҕа, Спартак Петрович Федотовка, Клара Федоровна Марковаҕа анаммыт ахтыы киэһэлэрэ тэриллибиттэрэ. Өссө да инникитин бу бырайыакпыт ситиһиилээхтик салҕанан үлэлиэ диэн эрэннэрэбит. Эбии хартыскалар бу сылканнан vk.ru/album-217622475_3090…