Нөмүгү нэһилиэгэр алтынньы 10 күнүгэр Аҕам саастаах дьон декадатын түмүктүүр «Кэрэни кэрэхсии кэлбиппит» диэн сынньалаҥ киэһэ буолан ааста. Тэрээһини Нөмүгү нэһилиэгин пенсионердарын уонна бэтэрээннэрин сэбиэтин саҥа талыллыбыт бэрэссэдээтэлэ Егорова Надежда Егоровна эҕэрдэ тылынан саҕалаата, активын кытта билиһиннэрдэ. Хаҥалас улууһун социальнай көмүскэл салайааччыта Константинова Светлана Николаевна нэһилиэкпит кырдьаҕаһын Любовь Саввична Ефремованы 90 сааһынан эҕэрдэлээтэ. Ол кэннэ, Любовь Саввична уонна Афанасий Гаврильевич Ефремовтар ыал буолан олорбуттара 55 сылынан (фарфоровай сыбаайба) торжественнай регистрация буолла, Ефремовтарга «Ытык ыал» аата иҥэрилиннэ. Регистрацияны олохтоох дьаһалта специалиһа Елисеева Лена Ивановна ыытта, бэлэхтэри туттарда. Нөмүгү нэһилиэгин пенсионердарын уонна бэтэрээннэрин сэбиэтин бэрэссэдээтэлинэн үлэлии сылдьыбыт Иванова Татьяна Дмитриевна аҕыйах тылынан үлэтин аҕынна, итиэннэ бар дьону бырааһынньыгынан эҕэрдэлээтэ.
Тэрээһин иккис чааһыгар аҕам саастаах кэрэ аҥардар урукку кэмнэр муодунай таҥастарын кэтэн, хааман көрдөрдүлэр. «Тирэх», «Талба» ансаамбыллар, Оксана Мазинцева, Исай Владимиров, Анатолий Нестеров, Полина Семенова, Александр Уваровскай ылбаҕай ырыаларынан, Исай Владимиров, Василий Гаврильев уонна Николай Томскай баянынан доҕуһуоллаан бу дьоро киэһэни киэргэттилэр. Бу киэһэ биир бэлиэ киэргэлинэн «Ретро хос» буолла. Петрова А. Н., Прокопьева Л. И., Семенова Л. А., Платонова П. П., Егорова Н. Е., Охлопкова И. Н. араас урукку кэм малларын биэрэннэр, кулууп үлэһиттэрэ сэбиэскэй кэминээҕи интерьердаах хос оҥорон, дьон хаартыскаҕа түстүлэр, сэбиэскэй кэмҥэ ыалдьыттаан аастылар. Көрдөөх-нардаах оонньуу оонньоон, викториналаан, минньигэс астаах остуолга наҕылыччы олорон чэйдээн, сэһэргэһэн, бэртээхэй киэһэ ааста.
