Бэс ыйын 9 күнүгэр Шамаев И. И. салайааччылаах Дьокуускай куорат лицейын 6 кылаас үөрэнээччилэрэ Нөмүгүгэ кэлэн «Айылҕа ситимэ» бырайыак чэрчитинэн ыалдьыттаан аастылар.
Кыраайы үөрэтээччи, А. В. Дмитриев аатынан Ой орто оскуолатын научнай үлэҕэ дириэктэри солбуйааччы Ноговицын Прокопий Романович бэйэтин дьиэтигэр көрсөн, «Музей в чемодане», «Эллэйаада» экспедиция булумньуларын көрдөрөн кэпсээтэ, Нөмүгү историятын сырдатта.
Ол кэннэ С. П. Федотов аатынан Нөмүгүтээҕи народнай театр режиссера Филиппова Алена Алексеевна театр туһунан кэпсээтэ, эдэр артыыс Сергей Новгородов «Уонна хаһан…» моноспектакль көрдөрдө. Бу спектаклы оҕолор ырыттылар, санааларын үллэһиннилэр. Театрбыт тэрийээччитин, бастакы режиссерун Спартак Петрович Федотов сиэнэ Ирина Геннадьевна Васильева, лицей учуутала, эһээтин дойдутугар кэлэн, театры көрөн-истэн барбыта эмиэ биир үтүө түгэн буолла.
Нөмүгү нэһилиэгэр 2011 сылтан арыллан үлэлиир «Айар кут» түмсүү худуоһунньуктара бэйэлэрин хартыыналарын быыстапкатын оҥорон, хартыыналар ис хоһооннорун кэпсээн, оҕолору кэрэхсэттилэр. Лицеистар көхтөөхтүк кыттан, бэсиэдэлэһэн, элбэҕи билэн-көрөн бардылар.
