Ыам ыйын 7 күнүгэр «Түһүлгэ» култуура киинигэр А. В. Дмитриев аатынан Ой орто оскуолатын коллективын кэнсиэрэ буолла. Бу үөрүүлээх тэрээһин ытыс дохсун тыаһынан доҕуһуоллатан, бэрт көхтөөхтүк ааста. Уопсай хор толоруутугар Наталья Борисова – Нарыйа тылыгар, Роберт Васильев матыыбыгар «Оскуолабыт биһиэнэ» гимн, ыам ыйын 1 күнүгэр 80 сааһын туолбут ытык киһибит Семенова Полина Петровна ааптардаах «Нөмүгүнү эн таптаа» диэн Нөмүгү гимнинэн саҕаламмыта. Марк Бабатунде толоруутугар «Perfect» Эд Ширан репертуарыттан ырыа, Саргылана Маркова, Прасковья Попова, Айна Григорьева сольнай ырыалара, эр дьон монтажтара, көрдөөх сценкалар, ретро-мода, фольклорнай нүөмэр, учууталлар үҥкүүлэрэ, ырыалара, оһуохайдара дьон биһирэбилин ыллылар. Эдэр учууталлар олус көхтөөхтүк кыттан, дьоро киэһэни киэргэттилэр. Кэнсиэргэ киирбит харчы барыта Покровскай 1 нүөмэрдээх орто оскуолатын 1 кылааһын үөрэнээччитэ Дьячковскай Георгий Москуба куоракка ыарахан ыарыыттан эмтэнэригэр ананна.
Оскуола дириэктэрэ Корякина Л. В.: «Бүтүн Арассыыйаҕа уонна Саха Өрөспүүбүлэкитигэр Оҕо уонна Дьиэ кэргэн сылын чэрчитинэн эҕэрдэ кэнсиэр туруордубут. Төһө да күннээҕи үлэ үөһүгэр сырыттарбыт, бу тэрээһиҥҥэ үлэһиттэрбит олус түмсүүлээхтик кыттан, талааннарын көрдөрдүлэр, нэһилиэк дьонугар дьоро киэһэни бэлэхтээтилэр. Кэнсиэргэ киирбит харчы, уопсайа 15100 солк., барыта Георгий Дьячковскайга тиийдэ, уол эмтэнэн үтүөрэригэр кыра көмө оҥордубут,» — диэн кылгастык санаатын үллэһиннэ.
Оскуола профкомун бэрэссэдээтэлэ Чичахов А.А.: «Кулууп үлэһиттэригэр оскуола коллективын аатыттан күүс-көмө буолбуккутугар улахан махталбытын тиэрдэбин! Өссө да инникитин бу курдук бэйэ-бэйэни өйөһө, айа-тута туруоххайыҥ. Кэлэн иһэр Улуу Кыайыы 79 сылынан улахан эҕэрдэ!» — диэн махтал тылларын анаата.
Маркова С. М.
