Күөх кырыска үктэнэн, оҕолорбут барахсаттар, көҥүл көрүлүү сырсар үтүөкээннээх кэмнэрэ – сайын буолуута – Бүтүн Аан дойдутааҕы оҕо көмүскэлин күнэ бэлиэтэнэр. Бэс ыйын 1 күнүгэр нэһилиэк иһинэн ыытыллар бырааһынньыктааҕы тэрээһин Ийэ скверыгар үөрүү-көтүү аргыстаах буолан ааста. 11 чаастан оҕолорго аналлаах эҕэрдэлэр, көрдөөх оонньуулар, күрэхтэр, аттракционнар, флешмоб үҥкүүлэр буоллулар. Күнүс 13 чааска «Кунг-Фу панда — 4» мультфильмы көрөн, кырачааннар олус дуоһуйдулар. Бу күнү нэһилиэк урбаанньыттарын минньигэс бэлэхтэрэ оҕо үөрүүтүн өссө үрдэттилэр. Убаастабыллаах Лебедев Александр Игоревичка («Эгэлгэ» маҕ.), Матвеева Варвара Егоровнаҕа («Успех» маҕ.) уонна Острельдин Ньургустаан Гаврильевичка («Үрдэл» маҕ.) барҕа махталбытын тиэрдиэхпитин баҕарабыт.
Маркова С. М.
