Нөмүгү нэһилиэгэр ыам ыйын 1 күнүгэр сыллата ыытыллар түөлбэ ыккардынааҕы спортивнай эстафета буолан ааста. Чөл олоҕу агитациялыыр, нэһилиэк дьонун түмэр, спорду пропагандалыыр тэрээһиҥҥэ 1, 2, 3 түөлбэлэр көхтөөх кыттыыны ыллылар. Оҕо саад иитиллээчилэриттэн саҕалаан, 56 өрө саастаахтарга дылы, маны таһынан депутаттар, түөлбэ салайааччылара кыттан, уопсайа 23 этаптаах эстафета буолла. Сарсыарда 11 чаастан «Түһүлгэ» култуура киинин таһыгар мустан, 1 түөлбэ — саһархай, 2 түөлбэ — хара, 3 түөлбэ кыһыл өҥнөөх футболка кэтэн тоҕуорустулар. Эстафетаны «Нөмүгү нэһилиэгэ» МТ баһылыга Устинов Наум Васильевич иилээн-саҕалаан ыытта. 2 түөлбэ — бастакы, 1 түөлбэ — иккис, 3 түөлбэ — үһүс миэстэҕэ тигистилэр. Кыайбыт 2 түөлбэ хайҕал суругунан уонна көһө сылдьар кубогынан наҕараадаланна, 1 уонна 3 түөлбэлэр хайҕал сурук ыллылар, онон, сүүрбүт, кыттыбыт дьон уонна кинилэр «ыалдьааччылара» үөрэн-көтөн тарҕастылар.
Маркова С. М.
