Нөмүгү нэһилиэгэр Дьиэ кэргэн сылыгар аналлаах «Саха ыала – кэскил төрдө, удьуор утума» диэн ааттаах 2024 сыллаах ыһыахпыт үрдүк таһымнаахтык ааста. Ыһыах үөрүүлээх арыйыыта, алгыс, баһылыкпыт Устинов Наум Васильевич эҕэрдэ тыла, «Ситим» түмсүү оҥорбут симиир иһититтэн уохтаах кымыс иһиитэ, алгыстаах оһуохай, араас күрэхтэр: «Оһуор-мандар ойуулаах саха мааны таҥаһа», «Дьиэрэй, көмүс кылыһах», «Ырыа куттаах дьиэ кэргэн», «Удьуор аймах күрэҕэ-2024», оһуохай күрэҕэ, спортивнай «Нөмүгү уолан» күрэхтэһии, үгэс быһыытынан хапсаҕай, мас тардыһыы буолла.
Ыһыах сиригэр түһүлгэлээн олорор бары ыалдьыттарга кымыс, үтэһэлээх эт түҥэтиллэн, дьон үөрүүтэ үксээтэ. «Түһүлгэ» сүүйүүлээх тэттик хаһыат нүөмэрдэринэн араас бириис оонньонно: сиргэ турар сөрүүкэтэр кондиционер, балаакка, мангал, афганскай казан, походнай остуол, үрдэриллэр улахан матараас, бассейн, вентилятор. Нөмүгү нэһилиэгэ киэн туттар дьиэ кэргэттэрин кытта ыһыах студиятыгар кэпсэтии буолла. «Удьуор аймах күрэҕин» быыһыгар Саха сирин эстрадатын сулустара Анастасия Готовцева, Варя Аманатова, Айгылаан, Эрхаан, Тамара Попова уонна Вероника Степанова эҕэрдэлээтилэр. «Үрүҥ түүнү» DJ Ashimi, KYN SOL, Ankharob, Харысхан Мойтохонов ыыттылар.
Маркова С. М.
https://clck.ru/3BnjpQ — Удьуор аймах күрэҕэ
