Ыам ыйын 24 күнүгэр «Тиһэх чуораан» Алексей Васильевич Дмитриев аатынан Ой орто оскуолатыгар буолан ааста. Сылаас, ыраас халлааннаах үтүөкэн күн туран биэрдэ, выпускниктар, учууталлар, ыалдьыттар бары өрө көтөҕүллүүлээхтик бу үөрүүлээх күнү атаардылар.
«Түһүлгэ» КК коллективын аатыттан Маркова С. М. тэрээһиннэргэ мэлдьи кыттар, көхтөөх выпускниктарга эҕэрдэ сурук, ону таһынан кыра бэлэхтээх кэллэ. Ол курдук, Тарабукин Толяҕа, Прокопьев Сандалга, Гуляев Никитаҕа, Гоголев Семеҥҥа, Чичахов Егорга, Яковлев Аликка истиҥ ис хоһоонноох эҕэрдэ суруктар уонна бэлэхтэр туттарылыннылар. Тиһэх чуораан күнэ олус долгутуулаахтык ааста, түмүгэр оскуола директорын иитии чааһыгар солбуйааччы Степанова Варвара Семеновна, итиэннэ 11 «м» кылаас үөрэнээччитэ Егор Чичахов төрүт үгэс үҥкүүтүн — оһуохайы таһаардылар.
Күндү оскуоланы бүтэрэр выпускниктар!
Тиһэх чуораан бырааһынньыга
Хас биирдии выпускникка
Олох киэҥ аартыгар үктэнэр
Кэрэ бэлиэ түгэнэ буолар.
Хаалбыт күннэргэ кичэллээхтик бэлэмнэнэҥҥит,
Экзаменнаргытын ситиһиилээхтик туттараҥҥыт,
Ситии-хотуу аттестаатын ылаҥҥыт
Талбыт идэҕитигэр киирэргитигэр.
Олох киэҥ тыргыллар аартыга арыллан иһиэхтин.
Үрдүккэ тардыһыҥ, кэрэни кэрэхсээҥ
Иннигит диэкки дьулуурдаахтык хардыылааҥ,
Дьоллоох олох аргыстастын!
