Кулун тутар 1 күнүгэр Нөмүгү нэһилиэгэр биир бэрт тэрээһин буолла. Яковлев Павел Павлович, Нөмүгү нэһилиэгин Бочуоттаах олохтооҕун, көрбөттөр түмсүүлэрин чилиэнин ааптарскай бырайыага – “Ымыылаах ыллыктар” диэн доруобуйаларынан хааччахтаах дьоҥҥо аналлаах ырыа күрэҕэ буолан ааста. Яковлев П. П. бэйэтин санаатын үллэһиннэ: “Бу ырыа күрэҕэ бастакытын 2019 сыллаахха буолбута. Кэлэр сылга хоруона хамсыга туран, куйаар ситиминэн оҥорбуппут. Ол кэннэ 2023 сылга ыытыллыбыта, онон бу төрдүс күрэхпит буолан ааста. Уопсайа 30 киьи: Дьокуускай куораттан, Уус-Алдан уонна Бүлүү улуустарыттан кэлэннэр, көхтөөхтүк кыттан бардылар. Финалга 16 киһи киирбитэ. Ол курдук, Гран-при хаһаайына Иван Карпов (Уус-Алдан), 18-35 саастаахтарга 1 истиэпэннээх лауреат Кыыдаан Моисеев (Дьокуускай куорат), 2 — Долгууна Иванова (Уус-Алдан улууһа), 3 — Егорова Сайыына (Бүлүү улууһа); 36 үөһэ саастаахтарга 1 истиэпэннээх лауреат Суздалов Валентин (Дьокуускай куорат), 2 — Андреев Петр (Дьокуускай куорат), 3 — Винокуров Сергей (Дьокуускай куорат); 65 үөһэ саастаах категорияҕа 1 истиэпэннээх лауреат Афанасьев Егор (Уус-Алдан улууһа), 2 — Ибрагим Ишниязов (Дьокуускай куорат), 3 — Степанова Анастасия (Уус-Алдан улууһа) буолбуттара. Көрөөччү биһирэбилин Кыыдаан Моисеев ылан, үөрүүтэ үрдээбитэ. Маны таһынан, махтал суруктар туттарыллыбыттара: үрдүк таһымнаах бэлэмнэнии иһин Спиридонов Николай Михайловичка уонна Алексеева Лариса Никитичнаҕа; тэрээһин ыытылларыгар көмө-ама иһин Макаров Николай Исаевичка, Харитонова Лидия Васильевнаҕа, маастар-кылаас ыыппытын иһин Потапов Алексей Алексеевичка. Махтал тылларбын тиэрдиэм этэ тапталлаах кэргэммэр Виктория Ивановнаҕа, уолбар Иван Павловичка, аймахтарбар, бииргэ үөрэммит кыргыттарбар, күүс-көмө буолбут табаарыстарбар, Татаринова Надежда Михайловнаҕа, уонна, иилээн-саҕалаан ыытыспыт «Түһүлгэ» Култуура киинин бары үлэһиттэригэр. Мэлдьи бу курдук кэрэни кэрэхсиэххэ, бары бииргэ буолуохха!»
Кэпсэттэ Саргылана Маркова
