Бу сыл муус устар 1 күнүттэн 10 күнүгэр диэри «Далбар Хотун» күрэс буолан ааста. Бу тэрээһиҥҥэ Сахабыт Сирин араас муннугуттан тоҕус далбар хотун кыттыыны ылан, НВК «Саха» НКИХ уонна «Далбар Хотун» сурунаал холбоһуктаах барылынан биэриигэ тахсаннар, куйаар ситиминэн куоластааһын ааһан, бары араас номинацияҕа тигистилэр.
Биһиги Нөмүгүбүтүттэн Акулина Александровна Уваровская кыттан, «Байылыат Хотун» анал ааты ылыаҕын ылла. «Ньургуһун» — нэһилиэк оҕуруотчуттарын түмсүүтүн чилиэттэрэ бэлиэтииллэринэн: «Акулина элбэх оҕолоох, улахан дьиэ кэргэн ийэтэ, эбээтэ. Кэтэх хаһаайыстыбатыгар сүөһү, бараан, коза, дьиэ көтөрүн араас көрүҥүн иитэр. Нэһилиэккэ сибэкки арааһын, отонноох мастары үүннэрэр уопуттаах биир биллэр оҕуруотчуппут буолар. Сайылыгар сайыҥҥы өттүгэр мини-зоопарка тутан үлэлэтэр,» — диэн куйаар ситимигэр кэпсииллэр.
Акулина Александровна 1972 сыллаахха Хаҥалас улууhун Нөмүгү нэһилиэгэр төрөөбүт. Дьокуускайдааҕы тыа хаһаайыстыбатын техникумугар үөрэнэн юрист идэтин ылбыт. Билигин төрөөбүт улууһугар, Ой нэhилиэгэр олорор. Кэргэннээх, алта оҕолоох, биэс сиэннээх. “ЛПХ Уваровская А. А.” диэн хаһаайыстыбаларыгар хороҕор муостааҕы, козалары, барааннары, 100-тэн тахса араас көтөрү иитэллэр. Оҕуруот ас арааһын оннооҕор виноград үүннэрэллэр. Акулина Александровна иллэҥ кэмигэр баайарын, кыралаан уhанарын сөбүлүүр уонна хаартыскаҕа түhэриинэн үлүhүйэр. Саас аайы рассада олордор, инкубациянан араас көтөрү таhаарар. Баҕа санаата: “Сэрии буолбатыгар баҕарабын. Чөл олоҕу өрө тутуоҕуҥ, айылҕабытын харыстыаҕыҥ уонна бэйэ иҥэмтиэлээх аһынан аһыаҕыҥ” («Далбар Хотун» сурунаал Telegram-ханаалыттан).
Бэйэбит өттүбүтүттэн Акулина Александровнаҕа сыралаах үлэтин көрдөрөн көхтөөхтүк кыттыбытыгар үөрэн-көтөн, «Байылыат Хотун» анал ааты ылбытынан ис сүрэхтэн эҕэрдэлиибит уонна алгыстаах аартыгын арылыннын, туругун тубустун, үөрүү үтүмэнэ үксээтин, табыллыы тайаннын, ситиһии сиэттистин диэн алгыс тылларын аныыбыт!
Маркова С. М.
